i tot m’ai estat lonjamenz,
guerreian ab mon mal seingnor,
e pert lai entre mos parenz
. . . . . c’uns no me·n acor,
ges non lais per tan
qe solaz e chan
no sega e domnei,
si tot me guerrei.

Anc guerra no·m fo espavenz,
ni mals traics, per so c’a honor
pogues estar entre las genz,
ses mal dich de fol parlador;
c’als non vei qe n’an
li ric, qant se·n van.
Per q’eu o plaidei,
segon so qe·n vei.

Bons cavals e bons garnimenz
am mais qe non faz joc d’austor,
mas dels deseretaz servenz,
qui, li malvaz, no·m fan paor,
mi torn’ad affan
qui me·n va parlan;
e non am ni crei
lor aunida lei.

Puois qe·l vescoms m’es avinenz
e·m rete per son servidor
molt li serai obedienz;
e lo coms non aura peior
guerrer a son dan,
q’eu non ai talan
mas de far qe·ill grei,
on q’an ni estei.