e Berguedan, d'estas doas razos
al vostre sen chausetz en la meillor,
q'ieu mantenrai tant ben la sordejor
q'ie.us cuich vensser, qui dreich m'en vol jutgar:
si volriatz mais desamatz amar,
desamar e que fossetz amatz.
Chausetz viatz celia que mais vos platz.

N'Aimeric, doncs auria sen de tos
si eu lo miellis non chausia d'amor.
Totz temps vuoill mais qe.m teignan per seignor
e que desam e c'om mi teigna car;
car en amor non vengui per musar
ni anc no fui d'aqels desfasendatz:
qe.1 gazaing vuoill de dompnas e de datz.

De Berguedan, nuils hom desamoros
al mieu semblan non a gaug ni honor;
c'aissi cum sens val mais sobre follor,
val mais qui serv e.n fai miells ad honrar
c'aicel qe vol penre e non donar.
Per q'ieu vuoill mais esser paubres honratz
c'avols manens e desenamoratz.

N'Aimeric, tot enaissi o faitz vos
cum fetz Rainautz qand ac del fruich sabor:
que s'en laisset non per autra temor
mas car non poc sus el cereis montar,
e blasme.1 fruich car aver ni manjar
no.n poc; e vos etz ab lui acordatz,
c'aisso que non podetz aver blasmatz.

De Berguedan, car vos etz malgignos
cuidatz qe.z eu sia d'aital color.
Non sui, q'en luoc de gauch pren la dolor;
mas bos respieitz m'ajud'a sofertar,
per qu'eu vuoill mais ses consegre enchaussar
que conseguir so don non fos pagatz,
car mil d'autres val us bens desiratz.

N'Aimeric, mainz de gaillartz e de pros
n'ai vistz faillir tot per aital error.
Q'el cors de N'Ot del caval milsoudor
en fo vencutz car no.l laisset brochar,
que si de prim l'agues faich enanssar,
cel qe.l venqet fora per el sobratz:
per c'om deu far, quan pot, sas volontatz.

De Berguedan, cella q'ieu teing plus car
vuoill mil aitans mais amar desamatz
c'ab autra far totas mas volontatz.

Bar N'Aimeric, ja no.us cuidetz gabar:
que s'amassetz aissi cum vos vanatz,
no.us foratz tant de Tolosa loignatz.